• Más detalles
• Migrar a Linux
• Por qué Windows non
• ¿Qué ye Linux?

Cómo malinterpretar el software llibre

Cinco idegues equivocaes tocante al software libre, esclariaes.

1. La industria del software nun puede furrular si nun se-yos paga a los programadores.

Escomencipiemos por daqué cenciello: A los programadores de software llibre sí-yos presta que-yos paguen y toos tienen los sos gastos.

Cuando dicimos "Software Llibre" referímosnos a la llibertá, non al preciu. El fechu ye que, vusté puede pagar por un software llibre (o "códigu abiertu" 1), que postreramente podrá estudiar, camudar y copiar como-y pruya.

¿Y acasu eso furrula? Puede imaxináselo d'esta miente: El software ye códigu, llueu el códigu ye matemática. Una vegada que vea'l códigu como una matemática útil, una llingua ellaborada (non una propiedá tanxible), nun alcontrará razón pa prohibi-y el so usu a les demás persones.

Al igual que la matemática (au naide reclamaría la propiedá d'una ecuación), el software requier conocimientu avanzáu pa que pueda ser adautáu, meyoráu y aplicáu de mou correcho. Ye equí au los desendolcadores suelen xenerar ganancies: Munchos veceros, xeneralmente compañíes, tán dispuestos a pagar por meyores y anovamientos de seguridá nel software.

Les compañíes de software llibre benefíciense d'un sistema de desendolcu descentralizáu con un gran númberu de voluntarios. Les ganancies de la industria del software llibre puede que seyan menor que la so contraparte privativa, pero de denguna manera son insignificantes. A la fin, los usuarios individuales suelen terminar usando'l software de baldre.

El software llibre nun intenta d'acabar colos incentivos de los programadores; trátase de ver el códigu como un conocimientu que nun se-y tien d'anubrir al usuariu. Cenciellamente furrula con un modelu de negociu distintu, que munches compañíes tán aprovechando.

2. El software llibre acaba con la innovación.

La idega que suel tener la xente ye que, si cualesquiera puede copiar idegues, la innovación vendráse abaxo.

En realidá, la llibertá suel ser la clave pal software llibre y la innovación.

• A la xente permítese-y y afalágase-yos a trabayar sobro él;
• Munches persones tán dispuestes a participar;
• Nun hai necesidá de reinvertar res; les idegues pueden implementase direutamente.

3. El software cenciellamente tien de furrular (¿Impórta-y a daquién el códigu abiertu?)

Cualesquiera tendría d'esmolecese tocante a si el so software ye llibre o non.

Imaxínese que compra un automóvil, y que-y prohiben abrilu. Nun importa que sepa cómo furrulen los automóviles, el fecho ye que naide sedrá quien a revisar el so motor. ¿Cómo puede tar tranquilu col so automóvil si nun-y dexen a naide verificar que seya fiable, que nun tenga una fuga o que nun afeute a la sociedá nin el mediu ambiente?

Lo mesmo asocede col software, esceutu que'l códigu sirvi pa muncho más que pa mover autos. El software remana los nuesos ordenadores, teléfonos, televisores, reproductores de soníu y más, tresportando información y la nuesa cultura.

El software llibre ye tan importante como la llibertá d'espresión. Si'l software ye llibre, los usuarios tienen llibertá y el control del mesmu.

La bona noticia ye que'l software llibre non sólo furrula bien, sinon qu'aveza a furrular muncho meyor. ¡Introduza un CD autónomu de GNU/Linux nel so ordenador pa prebar un sistema completu y bien organizáu, de mou que pueda xulgalu vusté mesmu ensin instalalu!

4. El software llibre nun respeta'l drechu d'autor nin les patentes de software.

Pa retrucar a esto, primero tenemos que facer una distinción nidia ente'l drechu d'autor y les patentes. El drechu d'autor concédese-y al creador d'una obra sobro la mesma (por exemplu, el testu d'un llibru o el códigu fonte d'un programa). Per otru llau, una patente ye'l control esclusivu que se rexistra sobro un procesu, l'aplicación d'una idega.

El drechu d'autor ye mui importante nel software llibre. Ye'l propiu mecanismu, esencial na Llicencia Pública Xeneral de GNU, per aciu de la que s'encarga de que'l software llibre permaneza llibre y que los autores reciban el créditu pol so trabayu. Los programes tán amparaos baxo'l drechu d'autor, yá seyan llibres o privativos.
Cualesquier autor de software privativu puede cenciellamente comprobar que nun se viola'l so drechu nún programa de software llibre, darréu que'l códigu fonte ta al algame de la so mano.

Per otru llau, les patentes nel software representen un conceutu mui controversial. Pa resumilo: Nun esiste res a lo que se-y pudiere denomar "software patentáu". Sicasí, daquién puede atribuyise la propiedá d'un procesu si rexistra una patente. Entós la patente aplicaría a tol software qu'use esi procesu, ensin importar que seya privativu o llibre.
Carauterístiques de les patentes de software:

• Son costoses y otórguense llueu de dellos años dende la solicitú;
• Tienen llímites xeográficos (una patente concedía nos Estaos Xuníos nun tien valor dengún n'Europa);
• Tien llargos períodos de vixencia (xeneralmente 20 años), nuna industria qu'avanza constantemente;
• Suelen ser procesos completamente triviales.

Como tal, raramente s'usen pa beneficiar a quienes innoven; de fechu, cásique enxamás s'usen polos propios innovadores.

Puede dicise que cualesquier pieza de software de medianu tamañu viola les patentes en dellos países, tanto llibre como privativu.
Dependiendo de la capacidá que tenga la compañía titular de la patente pa cubrir grandes gastos llegales, pueden aplicase restricciones y regalíes sobro tales patentes.

5. El software llibre ye como'l comunismu.

Los que sofiten esta idega, sofiten que nun puede haber propiedá privada con software llibre (o de "códigu abiertu" 2). Retruquemos a esto con un exemplu.

Supongamos qu'uses una aplicación que ye software llibre, tanto en casa como nel trabayu. Entós alcuentres una bona forma de meyoralu, de mou que cola to versión modificada, ¡agora'l to ordenador furrula meyor y fai el trabayu el duble d'apriesa!

Esta versión modificada ye la to propia versión. Nun tás angariyáu a falar d'ella con naide nin tienes que compartir la ganancia que sacasti mentantu la usabes. Cenciellamente tás exerciendo'l to drechu a usar y modificar el software.

Lo que la llicencia de software llibre desixe ye que si tú redistribuyes esti software, entós tendríes que caltenelu llibre. Concretamente, si vendes CDs que contengan el to software o entames a permiti-yos a persones ayenes a la to casa o llugar de trabayu que lu usen, tú tendríes que:

• Da-y a cualesquier persona los mesmos drechos que a tí te dieron cuando obtuvisti'l software orixinal, ye dicir, la llibertá de revisar, modificar y redistribuyir la to versión modificada,
• O, separtar les tos modificaciones del software orixinal, ye dicir, que'l trabayu final nun contenga dengún códigu del trabayu orixinal.

De mou qu'en realidá tienes más "propiedá" sobro'l software llibre que'l privativu (au el programador decide tolo que puedes y nun puedes facer col software).

El software llibre nun tien res que ver con un sistema políticu. Puedes usalu perfeutamente sobro software privativu y viceversa. La llicencia de software llibre cenciellamente ye un contratu éticu ente'l programador y l'usuariu final.