Dende Windows haza Linux

Qué ye meyor en Linux

• Ye llibre.

  Al contrariu de Windows, GNU/Linux ye software llibre:  ¡Instálalu en tolos ordenadores que quieras y da-yos copies a los tos collacios! Inclusu puedes estudialu, camudalu como te pruya, o facer y vender la to propia distribución.

• Aplicaciones.

  Esiste una descomanada llista de programes llibres disponibles pa Linux de baldre. Puedes facer documentos profesionales, quemar CDs de música, editar semeyes, diseñar un sitiu web u organizar la to música xusto dempués d'instalar. Nun hai necesidá de mercar software de 200$ con llicencies restrictives.
  L'instalador incorporáu fai que seya increíblemente fácil alcontrar, instalar y desinstalar programes, desaniciando la rutina de restolar na web software que nun-y faiga dañu al ordenador.
  Arriendes ye seguro: Puedes escaecete del software con versiones de preba qu'espira a los 30 díes, o el peligrosu freeware que contamina la web.

• Ensin molesties.

  Pa caltener el ordenador en forma col pasu del tiempu nun tien que ser necesario una llucha constante. Un añu dempués de la so instalación, GNU/Linux furrula tan rápido como'l primer día. Ya inclusu puede da-y vida al to vieyu ordenador.
  Arriendes, Linux permítete tener lo que quies y desfacete de lo que nun quies. Si tuvisti problemes pa desfacete del MSN Messenger, les notificaciones d'actualización de Windows, o l'asistente Clippit, Linux prestaráte abondo.

• Seguridá.

  Escaezte de los costosos y restrictivos anti-virus, anti-spyware, anti-"res" y anti-"tou". Linux ye abondo, enforma seguru.
  A los usuarios de Windows fáise-yos difícil de creer que nun esiste spyware nin virus en Linux, pero ye cierto. El software maliciosu tienlo bien complicao nún sistema bien fechu.
  Les actualizaciones regulares y cencielles de GNU/Linux caltienen el sistema dafechamente a salvo.

• Sofitu.

  Linux saca partíu d'un gran xacíu de comunidá, cuya amabilidá podrá sosprendete. Si trates de facer daqué complicao y nun yes quien a ello, hai muncha xente dispuesto a echate un gabitu. La nuesa páxina "Más detalles" indicaráte au tienes d'empobinate.
  Les compañíes darrera de les principales distribuciones de GNU/Linux, como Canonical o Red Hat, tamién apurren sofitu téunicu especializáu y comercial.

Lo que ye cásique igual qu'en Windows

Fundamentalmente, al usar GNU/Linux los usuarios alcuéntrenlu bastante parecíu a Windows o Mac OS X.

• Configuración xeneral:

  Si crees que pa usar Linux entá tienes qu'usar códigu y la consola, equivóqueste. ¡Les coses fai tiempu que camudaron!
  Lo mesmo que Windows, Linux tien d'aniciase al prender el ordenador, y llueu puede entamase a usar los programes. La barra de xeres y les aplicaciones parécense a les de Windows o Mac OS X.
  
  ¡Tenemos captures de pantalla!.

• Restolación web y xeres comunes:

  Otra bona noticia ye qu'Internet vese igual dende Linux (de fechu, puedes ñavegar col mesmu programa, si yá uses Firefox). Y por supuestu, puedes usar la to coleición de música y semeyes tamien. Los ficheros y direutorios remánense con un xestor de ficheros asemeyáu a Esplorador de Windows.

Lo que nun ye tan bono en Linux

• Soporte de controladores.

  Los fabricantes non siempres ufren controladores pa Linux nin espublicen les especificaciones de los sos preseos.
  Por esta razón, a vegaes nun hai controladores pa les tarxetas gráfiques más nueves nel mercáu; los voluntarios tienen d'aplicar inxeniería inversa a los controladores de Windows. Arriendes, dalgunos úfrense gratuitamente, pero baxo llicencies restrictives.
  Llamentablemente, lo mesmo asocede con munches tarxetes WiFi.
  Hai que dicir, sicasí, que la mayoría de los ordenadores con hardware "estándar", furrulen direutamente coles principales distribuciones de Linux, darréu que los controladores vienen incorporaos. Hardware común como llaveros USB o cámares fotográfiques enxamás tienen problemes.

• DVDs y formatos restrictivos.

  Munchos formatos multimedia al nuesu alrodiu son propietarios, y les sos especificaciones nun se dan a conocer; esto supón, a grandes rasgos, que los programadores de Linux tienen de pescudar cómo lleelos ensin aida de los creadores del formatu.
  Esto podría llevate a saltate la encriptación en dalgunos DVD's y la Xestión Dixital de Restricciones (DRM) en dalgunos ficheros de soníu, entá y cuando s'heban alquirío completamente de mou llegal, porque d'otru mou quiciabes nun furrulen en Linux. Desafortunadamente, dependiendo d'aú vivas, saltase les restricciones puede considerase illegal (magar que mercares el productu de mou llegal).
  
  Puedes conocer más na nuesa rempuesta a la entruga frecuente ¿Puedo reproducir los mios MP3s y DVDs baxo GNU/Linux?.

• Xuegos.

  Los xugadores experimentaos decataránse de que'l mundu de los xuegos en Linux ye menos profesional qu'en Windows: Los grandes desendolcadores de videoxuegos paecen tener pocu interés pola llibertá na computación, lo que significa que munchos de los xuegos más famosos nun furrulen en Linux, o requieren d'emuladores privativos pa furrular.
  Afortunadamente hai comunidaes enforma actives pal desendolcu de xuegos llibres, y tienen fecho bastantes xuegos llibres de bona calidá, tanto en 2D como en 3D. Visita el foru de la comunidá asturiana d'Ubuntu si necesites más información.
  
  Alcontrarás más información na nuesa rempuesta a la entruga frecuente "¿Podré xugar famosos xuegos 3D baxo GNU/Linux?".

• Arranque anicial ya ivernación.

  En dalgunos ordenadores, ivernar nun ye de tou fiable, una vegada más, por problemes de controladores. El problema más avezáu ye la perda de la conexón WiFi dempués d'ivernar en ordenadores portátiles cuyos controladores nun son llibres.

Conclusión

Saber con antelación si se va a esfrutar de Linux depende en gran midida de lo qu'esperes d'él.

• Si quieres que Linux seya esautamente igual a Windows, dablemente quedarás deceicionáu. GNU/Linux fáise por persones que tienen l'enfotu de que seya distintu. Ente ellos esisten distintes visiones tocante a cómo sedría'l sistema operativu ideal. Esta diversidá d'opiniones fai que participar en la creación de Linux seya daqué tan especial ya interesante.
• La to llibertá importa. Milenta de persones en comunidaes y compañíes trabayen pa facer software sobro'l que tú puedas exercer la to llibertá. Usandob GNU/Linux ye la forma más cenciella de facelo.
• ¡Ye divertido! El nun tener qu'esmolecese de spyware, virus, activación de programes, programes qu'espiren, o alcontrar software que ye realmente llibre, fai que de la nada usar un ordenador seya una esperiencia agradable.

Esperamos que faigas aína la migración. Hai una gran comunidá esperándo-y y naide va a dicite "mércalu y rexístrate".